Alfons Vinzens
1915 - 1991
Naschius a Zignau. Seminari da scolasts a Cuera. Tochen sia pensiun scolast primar a Cumbel e Trun. Duront 25 onns organist en uffeci accessori da sia vischnaunca natala Zignau. Alfons Vinzens scriveva poesias gia duront il seminari scolastic. Per ses scolars scriveva el tocs da teater che Eduard Lombriser metteva per part en musica. El metteva en drama temas historics, per exempel «Il narr de Frunsberg» (1953), «Il davos castellan de Cartatscha» (1946), «La cocarda», «In pievel en turmegl» ed «A Trun sut igl ischi». Ultra da quei scriveva el era giugs religius sco «Bernadetta, la sontga de Lourdes», «Flurs a Catania» ed «Il scuavias de Sogn Stiafen» sco era il giug auditiv «Il sault cun la patria». En fuorma da manuscret existan ils suandonts giugs per affons: «Dunna Holla», «Gionin e Greta», «La steila», «L'unfrenda dil paster», «Treis portas». Vinzens vegneva savens incumbensaus da scriver texts per cantatas e recitativs. Ver tschien da ses texts ein vegni mess en musica. (Ord:«Theaterlexikon»)